淫照風暴中，所牽涉的男女主角都成為大輸家，不斷傳出婚變消息的張栢芝，為要杜絕老公謝霆鋒睇相，更以死相迫，威脅抱子跳樓。

栢芝發癲，原來是她一直講大話。○六年二人復合，霆鋒曾開口問過栢芝與陳冠希的緋聞是否屬實，當時女方矢口否認。但淫照一出，霆鋒即時識穿栢芝隱瞞真相。一向大男人，連栢芝著得性感啲都大吵大鬧的霆鋒根本無法忍受，決定離婚，但栢芝以尋死威脅。風頭火勢，他只好按兵不動。本週一（二月廿五日），首度復工的霆鋒激瘦現身機場出發往北京時，忍唔住舉高手，刻意展示自己冇戴婚戒，明示同栢芝夫妻關係無得掹！

起飛腳踢人
淫照流出後，不時傳出婚變消息的栢芝幾乎足不出戶，一家人為避開傳媒，更連環搬屋。

一直匿埋唔見人的霆鋒，本週一終於首度蒲頭，以代言人身份赴北京出席運動品牌特步的「2008全國營銷大會」。

留了鬍鬚，雙頰凹陷，激瘦十磅的霆鋒戴上黑超，於早上七時半現身機場，在保安包圍下入閘上機。飛抵北京機場時，他由廿名保安保護出閘。其間一度行錯路，保安為突破重圍，不惜起飛腳踢人，其時霆鋒被問有冇睇過栢芝淫照？他冷笑不發一言，但對婚變傳聞，他說：「我哋好好，多謝關心！」完全無任何刺激到栢芝的言論。

有指霆鋒早前搬到保安森嚴的四季酒店暫住，並因此與陳冠希狹路相逢，霆鋒忍唔住向對方郁手，要栢芝喊住阻止。本週一晚完成北京工作即晚返港的霆鋒，對此充滿戲劇性的傳聞一味扮傻：「係咩？有啲咁嘅事？」然後上車離開，返回愛都大廈。

當年否認同陳冠希拍拖
表面扮無嘢，但思想傳統的霆鋒根本受不住老婆被睇全相的事實；尤其是當他知道栢芝講大話，對他不忠，更加下定決心要離婚。

「霆鋒表面好似無事，其實已經有部署同栢芝離婚，因為○六年佢哋復合，霆鋒曾經問過栢芝，有冇同陳冠希一齊，當時栢芝誓神劈願話冇拍過拖，點知啲相一出，就踢爆佢同霆鋒好番之後，仲同陳冠希藕斷絲連嘅事實，霆鋒嬲到震，所以決定同佢離婚，不過唔會係而家。」知情者說。

未有即時提出離婚，為的是怕栢芝會傷害自己及兒子，所以霆鋒在栢芝面前一直扮無事，只是以大家冷靜下而分房瞓。

「話佢而家提出離婚，一定備受千夫所指，因為栢芝已經咁慘，呢一刻唔要佢，啲人一定覺得霆鋒好衰。」

霆鋒、栢芝本來一家人融融洽洽，但淫照愈出愈激，連老爺謝賢都唔再幫口撐栢芝。

淫照風暴後，霆鋒首度露面時，多次刻意舉起手，以示除低婚戒，栢芝今次真係喊都冇用。

老爺怕冇面
霆鋒唔要栢芝，連一向自稱最錫新抱仔的老爺謝賢都支持。上週五（二月廿二日）出席BMA春茗時，四哥由開口力撐兩人婚姻冇事，到全程封嘴唔肯提栢芝，態度一百八十度轉變，全因覺得無面。

「栢芝嘅相愈出愈激，唔單止拉姑激氣，連老爺謝賢都覺得好冇面，新年都冇乜點見親戚，驚俾人問起唔知點答，佢連鬧栢芝都費事，寧願留番啖氣暖肚！」知情者說。

喊住訴苦
其實栢芝心裡有數，出事後，霆鋒情緒極度低落，日日匿喺房打機打通宵，即使栢芝試過開口要求陪霆鋒打機，亦被拒絕。

「栢芝知道段婚姻凍過水，已經好努力去補救，成日借囝囝做話題，同霆鋒傾偈，但霆鋒態度都仲係好冷淡，所以栢芝成日喊住打俾屋企人訴苦！」知情者說。

淫照事件分分鐘令栢芝冇咗個家，陳冠希就算講多幾多句道歉，睇怕都保唔住謝霆鋒同張栢芝段婚姻。

波折重重
謝霆鋒與張栢芝○六年復合並閃電結婚，但一直不被看好，被狠批遲早離婚，唯兩人依然經常高調晒幸福，並於去年誕下兒子謝振軒（Lucas），可惜「淫照」流出後爆發連串風波，對二人婚姻帶來極度衝擊，關係凍過水。

01年拍攝電影《老夫子2001》已互有好感，但當時男方與王菲熱戀中，故二人只能以契兄妹相稱。

02年栢芝為東華三院籌款演出飛車，傷頸入院，霆鋒細心關懷，「王鋒戀」因此而結束。

03年霆鋒與王菲再度復合，被飛的栢芝大受打擊，行為變得顛喪。

06年兩人拍攝《無極》復合，並於同年九月秘密在菲律賓閃電結婚，其後霆鋒戴上婚戒默認婚訊，但外界對二人婚姻並不看好。

07年恨生仔恨到發燒的栢芝婚後不久即懷孕，並於去年八月誕下兒子Lucas。

08年「淫照」曝光，栢芝裸照在互聯網廣泛流傳，二人一直避見傳媒，直至本週一（2月25日），首次公開現身的霆鋒刻意脫下婚戒，二人婚姻亮起紅燈。